Jennifer Keane-Dawes, Contributor

Happy Mother's Day to me boonoonoos madda Miss Celes. To yu. An to all maddas dis mawning. For yu know weh me discover? Yu see fram Massa God bless yu wid a good madda? Like fe me own? Nuh wud nuh deh fe explain dat deh miracle.

Suh missis ma, if yu madda alive, love har. Tek care a har. An memba. Massa God seh nuh fesake har inna har ole age. Him neva stipulate whether she used to treat yu good or bad. Him seh, nuh fesake har. An missis, if she pass off, me really sarry fe know. For me meself lose me fahda. But memba har goodness yu hear? An try kip heart.

College educated

For me dear lady, when yu tek it an look pon it, we hab nuff college educated madda a yard. Especially mongst de group a people inna dem fifties go right back dung. But if truth was to be told, we also hab a great majority a maddas inna dem seventies, eighties an nineties. Even hundred year ole. Like me gran aunty. Weh come outta grade book. Fadge life. An raise dem pickney wid a determination fe gi dem a good education suh dem nuh haffi suffer like dem, de madda.

An how yu believe now, seh dem deh madda survive? An tun roun teach we how fe survive? Through a lilly ting name common sense. Weh nuff smady a try fine inna dictionary for dem neva hear dat deh wud fram dem bawn. Well, a suh comes now yu notice dis:

Number 1: De general manager weh walk een a hawfice. Dress to puss foot wid attashy case. While de half dutty white shut a beg John Public fe tear him off an fling him weh. Yet, dis is de boss of ebrybaddy. Weh love set dung rule an regulation. But still neva learn common sense seh white an colored clothes nuffi wash inna de same water. Much less put a soak till de water draw rope.

Number 2: Ebrybaddy a de hawfice decide fe pitch een an bring something fe de birthday party. Except general manager. Missa nyam-de-morest. Who promas dis an dat. But tun up inna de bad color shut wid him two long han. An still neva learn common sense seh smady a go notice seh him neva bring nutten. For a nuh de fuss time him dweet.

Number 3: Smady sight Missa general manager inna jeans. An cap. Dung a Coronation Market a reason wid dis lilly ole ooman weh a sell taste-an-buy rat pizen. De ooman an general manager nose hole hab de same distance flare out inna two helleba brim. Suh when him come a work Monday mawning an de smady ask him if a him madda.

Him quick seh no. Him madda lib in Henglan which part him bawn. But him still nuh hab common sense fe memba seh two month a back she did lef some fry dumpling an callaloo wid de security guard. Wid a metchiz seh him madda seh fe tell him mawning.

Number 4: Missa general manager madda siddung pon de market piazza over har taste-an-buy rat pizen a consider. How she gi him two tings. Education. An de Bible. How she warn him ova an ova seh a nuh suh she raise him fe worship money an den lib like him wutliss.

Fe years now she a beg him fe repent. Fe accept Jesus Christ as de Son of the Living God. An den him life wi count fe something. But still. General manager nuh hab common sense fe listen to him madda. Who hab de full understanding seh if him dead without Christ, him doom to eternal separation from God. Tek care!

Dr Jennifer Keane-Dawes is a professor of communication at Elizabeth City State University, a constituent institution of the University of North Carolina System. Send your email to: jkd876@yahoo.com