Hutchinson

Dear Missa Newspaper Edita Sir,

Yuh is a learned man

An since mi never go past six book

Help mi fi andastan

Big 'man rain' a fall fi two wholla

week

Floodration pon di lan

Everybody house an lan a wash way,

an mi a

still bade out a pan

Mi a expert pon teck one deggeh

deggeh cup a water

Tidy house and cook and clean

An when mi done nu still can 'wah possible'

If yuh know weh mi mean

For mi haffi teck bad tings meck joke

Mi mus an boun fi laugh

Kuh water a run through mi

neighbour house

An mi still have water lock off

From Misstress Noah did a keep house

inna di ark

Clear up to present time

Big floodration rain fall every year

At around di same time

Fi mi gang a country look pon di

moon fi know

Wen di rain a go drop

Even di fowl dem know fi come out

a di tree

An go inna di house top

Every ratta fly come een from outa door

Every patoo a meck nize

Is ongle govament an di wedda people dem

Rain ketch as big surprise

An when di rain come an wash weh everyting

Big money haffi spen

Missa govament fren dem get contract fi fix

up road

Fi rain mash it up again

Dem ever a meck announcement say water a

run low

An how di dam almost dry

How water neer fall inna di catchment area

An dem nuh know di reason why

"Water never fall in di catchment areah nuh"

But what a wicked rain

Fall ina circle right roun di outside of di dam

Like it a play a game

Govament kyaan collect taxes, so mi tink is a

plan

Fi collect some revenue

By setting up one perfume factory so if yuh

no bade

Noboday nah go run from yuh

Or dem a go set up some public shower out

a square

An since wi know dem bruck

Start charge people dalla a head fi bade

Tell dem it nah go wuck

For if a ten days cabbage water a run di place

As di order of di day

By di time all a wi get use to di smell

It nah go smell no way

Missa Edita mi gawn go rub out some clothes

Mi just had to share mi thought

An tell govament say rain a go fall again

dis year

An wi tired fi water short!