Amina Blackwood-MeeksWELL MISS Lady doan know Likkle Miss Jing Bang to be careless in any aspect of har life, so she really doan understand how JB cudda put anyting into har mout dan en up a choke. So she run go to Miss Lady who have a manoevre fe enyting an dese days she is de hooman over everyting. So she grab Jing Bang an spin har roun an gi har wan debil of a lick inna har back an buff, de sinting dat was choking har fly outa har chest, drap a grung an JB start breathe freely again.
If dat never work an de piece a fish bone never fly out Miss Lady was going to give har piece a de leff ova flour dumplin inna de buttery, meck har bite it two time, nuh chew it fine an swalla it. See if fish bone nuh move! Miss Lady sey a really careless Jing Bang careless for is nat de firs time inna har life she eat fish an she know sey fish have bone an she know how fe search dem out an fling dem which part dem belongs. Den what cudda prompt har fe gane buy farin fish inna fancy wrapper affa supermarket shelf an swalla dung de propoganda pan de label bout "boneless" an cook it an put inna har mout widout har own private investigation.
OLE TIME PEOPLE
Miss Lady sey choke is what happen to we de minute we let dung we guard and get too modern wid we self an feget how ole time people teach we fe cautious wid everyting. She sey a same way nuff tings a go choke de whole a we if we insist pan gwaan like we too modern and too globalise fe pay attention to certain tings what is happening roun we an ax de question what come up inna we owna mind an stap gwaan like sey de ongly question we can ask is what we get permission fe ask.
Teck for instance now de ting dat is alleged to have taken place uppa de University what day. For it can be nutten but an allegation to all but de eye witness dem. An de mount a big wuds what heap condemnation an speculation an vituperatives pan de student dem head, dem dun get tried and convicted as barbarians, she waan fe know how comes nobaddy nuh waan speculate sey smaddy choose fe deliberately go up deh so an provoke an incident, knowing full well what de outcome would be, in order to give rise to a renewed outcry bout hate crimes inna Jamaica. Well she sey, she a speculate it. For dat dey likkle ideology did get a beating recently chu being as how some people cudden come out an sey ah dem really a hate demself an some adda people wudda rada choke dan say it, an some a choke because dem dare nat say it for dem come in like Bob offsprings, widout one fren inna high society fe help dem wid nutten and dem jus haffe gwaan choke an proteck de sweat a dem brow.
POISONOUS BARRACUDA
But Miss Lady sey sooner or later all de sinting dat should be spoken, but remain unspoken chu any permutations of reason is gwine to stick inna we gullet like a poisonous barracuda bone. It a go choke we yu see. Wedda de obstruction is acciedental or deliberate, de result is going to be a restiction of airflow. We face a go turn blue an we yeye dem a go run nuff wata.
It a go choke we how we tink sey it is okay fe name out girls school name an pint finger pan sexual deviance of likkle girls but likkle boys entikle to fe dem owna deviance an nuh comparison nuh write pan boys school. Miss Lady sey it a go choke we, how we gwaan like sey big man wid likkle girls is de biggest disgrace in de worl but big man wid likkle bwoys is nat anybady business. She sey it is going to choke we, having the effect of strangulation an dat can lead to unconciousness, meck we nuh know nutten else dat is happening. Worse, she sey it cudda lead to cardiac arrest, lack up we heart, leff it inna solitary confinement till we feget how fe feel an what to feel it about.
For she sey, for example, she nuh know anymore how we really feel as a nation, bout democracy. For she sey she see nuff people still a gwaan like sey de way fe get enyting is fe get frenly wid who yu tink have de power fe give out tings an dem yu get whey yu want an who nuh have no fren into nowhere doan get nuttin.
PARADIGM
An dem a carry awn into de same ole paradigm while dem a give soso chat bout hope an new day. An dem a do it like sey dem tink sey nobaddi naw see dem, an who see a play de game like sey dem nuh see an everyting a carry awn like a game of see no evil, hear no evil, speak no evil. It a go choke we, yu see. For choking also means compression of the neck, force it fe can only stay inna wan direction, prevent yu fram turn yu eye into anadda direction fe teck note of anyting else, giving new meaning to de phrase, stiff-necked fools.
Miss Lady is warning dat failiure to cough up the object could lead to the necessity for advanced medical intervention like doctor a poke ting inna yu windpipe fe try an restore yu breathing capacity. She sey before it reach dehso, better we maintain vigilance over what we know we suppose to do, run we own check an countercheck no matter what write pan de label for dem cudda put awn pan local name pan a farin objeck meck yu tink sey is really your ting in order to make it more palateable an when yu yeye dem start bulge outa yu head an yu kean even talk fe bawl out fe help is too late fe sey dat de choking due to de introduction of farin objects is de worse kine of choking of all.
