Jennifer Keane-Dawes, Contributor

KEANE-DAWES

Me dear mam.

Me nuh really know if yu a pay attention to de politics between Barack Obama an Hillary Clinton weh bin campaigning fe de Democratic Party support one a dem fe run fe president a de United States. Well missis, lass week Tuesday mawning was de time when de district weh me lib eena was suppose fe vote. Suh me naw tell yu nuh lie. Me couldn't wait fe day light fe go hegs up side a backra an cast me vote fe Barack Obama. For me dear lady, ebry time me look pon him, a me son me a see. Although dem nuff year apart, dem bawn de fourth an de fifth a de said month. An a dem madda an gran parents das tek care a dem. For dem neva hab a pupa fe help raise dem. Plus, pon top a dat, de two a dem a black man inna Merica, a place weh, between yu, me an de door post, backra an circumstances mek nuff Black man come een like dem nuh count fe nutten.

Well, when me reach a de fire station weh tun polling station, me tek me ballot an shade een de circle side a Barack name. Watch a ooman shoob it eena de machine. An me go bout me binnis. An missis mam, when de poll close an Barack win inna de state weh me lib, a feel good how me vote count fe something. For me dear mam, me nuh memba if me did tell yu how, after me riss me life. Me did call dung fe tunder fe roll an bruck me neck if me eva vote a yard again. For one long time inna general election, me was returning hawfica up a de polling station inna Olympic Garden. An de mawning in question, me barrah me madda sheet, get help an heng it up wid couple clothes pin inna de room fe gi voter privacy. An after voting done de night, me an de next smady dem weh did work inna de polling station, count de vote. Me, personally beat me chest an count de vote pon me ten finga an me ten toe. An de man weh lose lose. An de man weh win win. Me put de ballot box key inna me bosom. Hold de box gainst me chest. An go siddung eena pitch blackness. Dung eena de belly a de helleba soldier vehicle weh dem sen fe me. Inna de midst a de gun shot an killing. Well, a cyan tell yu how a feel de next mawning when RJR announce dat de man weh me sure know lose inna Olympic Garden, win by landslide.

AP - Democratic presidential hopefuls, Senators Barack Obama and Hillary Rodham Clinton.

tek-people-fe jackass bisniss

Me dear mam, fram dat deh day till now me nuh vote again. An me nuh really kyah. For me cyan tek de tiefing an de tek-people-fe jackass bisniss. For a de said kine a sinting das when me a pickney, mek we did set up fe ketch dis man. Two a clack one mawning. Inna me madda fowl coob wid flash light an crocus bag. An de frighten him frighten, come talk bout a investigate him a investigate de fowl dem.

Well, de Prime Minister pupa an son weh me tenkful fa fe bring een Common Entrance an student loan fe mek black pickney like me g'a high school an tun roun get university education. Liddung pon dem dem back a Heroes Circle. Plus, Massa God bless me fe lib fe see a ooman coulda tun Prime Minister. An Missa Shearer, de one who nuff smady use to look to fe cry peace, dead an gone long time. Dis like me vote. Cho. Me too ole fe tek de hackling.

Tek care.

Dr Jennifer Keane-Dawes is a profesor of communication at Elizabeth City State University, a constituent institution of the University of North Carolina System. Send your email to: jkd876@yahoo.com